Адна з падзей у Дзень беларускага пісьменства ў Полацку — прэзентацыя ўзноўленага самага старога друкаванага дакумента Кітая.

І адбудзецца гэтая прэзентацыя 3 верасня аб 11-й гадзіне на полацкай пляцоўцы фестываля кнігі і прэсы — на «Друкарскім двары XVІ стагоддзя», дзе будзе гаспадарыць сучасны друкар, лаўрэат прэміі «За духоўнае адраджэнне» Уладзімір Ліхадзедаў.

Вядомы ў краіне і за яе межамі філакартыст, гісторык, член Саюза пісьменнікаў Беларусі, ён вылучыў многія ініцыятывы, рэалізаваў у падарунак да 500-годдзя беларускага кнігадрукавання многія добрыя справы. Узнавіўшы «Алмазную сутру» па старых тэхналогіях, беларускі руплівец нагадаў пра тое, што ў Паднябеснай вытокі кнігадрукавання адносяцца да 868 года. Хто ведае, магчыма, вопыт кітайскіх першадрукароў быў вядомы і нашаму Францыску Скарыну.

— Другая з вядомых друкаваных у свеце кніг — «Алмазная сутра» — не можа не прывабліваць, — дзеліцца сваімі развагамі Уладзімір Ліхадзедаў. — А ўвогуле самім зваротам да ўзнаўлення гэтага помніка кніжнай культуры я хачу падкрэсліць важкасць стасункаў паміж народамі і культурамі. Ва ўсе часіны такія зносіны былі асновай міралюбства і гуманізму. Дык чаму зараз нам не шукаць еднасць у памкненнях да асэнсавання розных культур, да развіцця і ўмацавання паважлівага стаўлення да чужых здабыткаў?! Якраз да станоўчага адказу на гэтае пытанне і скіраваны мой шматгадовы праект «У пошуках страчанага».

Поруч з узноўленай «Алмазнай сутрай» на «Друкарскім двары...» можна будзе пазнаёміцца са скарынаўскай спадчынай.

Мікола БЕРЛЕЖ