Дырэктару замкавага комплексу «Мір» Вользе Папко ўдалося адшукаць у Фэдэральным архіве нямецкага горада Кобленц дзве карты мястэчка Мір XІX стагоддзя. Дзякуючы такой знаходцы была распачата адметная ініцыятыва — на дамах вырашана было ўсталяваць таблічкі з гістарычнымі назвамі вуліц.
«Нам удалося атрымаць фактычны матэрыял, адкуль мы ўзялі гістарычныя звесткі. Калі б трапіліся карты больш ранняга часу, на таблічках, пэўна, былі б адлюстраваныя іншыя назвы, — адзначае спецыяліст па сувязях з грамадскасцю замкавага комплексу «Мір» Анаіт Арзуманян. — Пэўныя архіўныя звесткі ўсплывалі ў Літве. Пэўна ж, могуць быць яны і ў Польшчы... Нядаўна дырэктар адшукала ў архіве ў Маскве перапіску князёў — апошніх уладальнікаў замка. Гэта былі шматлікія лісты, напісаныя Клеапатрай Святаполк-Мірскай. Нашы супрацоўнікі зрабілі копіі некаторых з іх — тых, што непасрэдна датычацца ўладкавання замка».
Днямі праца па замене шыльдачак ужо была скончана — усяго ўстаноўлена 76 новых. Дарэчы, мясцовым жыхарам такая ініцыятыва прыйшлася даспадобы: хтосьці нават прапаноўваў заплаціць за шыльду на сваім доме, аднак увесь праект цалкам праведзены за грошы замкавага комплексу.
Цікава, што ў XІX стагоддзі многія сучасныя вуліцы былі падзелены на дзве, а то і тры часткі. Напрыклад, сённяшняя вуліца 17 верасня складалася з вуліц Мінскай і Мінскага прадмесця. Вуліца Ленінградская была Завальнай, а завулак Ленінградскі — вуліцай Гуменнай.
У музеі адзначаюць, што шыльды з гістарычнымі назвамі будзе вельмі зручна выкарыстоўваць для правядзення экскурсій. Бо менавіта старыя назвы захоўваюць шмат звестак пра мінуўшчыну і многае расказваюць пра мясцовасць. На скрыжаванні колішніх вуліц Глухой, Татарскай і Віленскай стаяла мячэць. Да сённяшніх дзён яна не захавалася, але акурат дзякуючы таблічкам можна больш наглядна ўявіць месца, на якім яна размяшчалася, і яго атмасферу.
Ніна ШЧАРБАЧЭВІЧ
| Версия для печати | Сообщить администратору | Сообщить об ошибке | Вставить в блог |
