Гэта ўнікальнае выданне, аналагаў якому няма на ўсёй постсавецкай прасторы, пабачыла свет у выдавецтве «Беларуская энцыклапедыя імя Петруся Броўкі». Праца над доўгатэрміновым праектам была распачата яшчэ ў 2008 годзе. І вось зусім нядаўна выйшаў апошні том, і беларуская грамада атрымала поўны даведнік па ўсіх сферах айчыннай культуры.
Выпуск быў ажыццёўлены на заказ і пры фінансавай падтрымцы Міністэрства інфармацыі Беларусі, у цесным супрацоўніцтве з Міністэрствам культуры.
— Энцыклапедычныя выданні цяпер перажываюць пэўнае аднаўленне, усё больш іх выходзіць у электронным выглядзе. — адзначыў першы намеснік міністра інфармацыі Ігар Луцкі. — Таму вельмі важна, каб папяровая версія «Культуры Беларусі» пабачыла свет і ў электронным выглядзе. Мы прыкладзём для гэтага адпаведныя намаганні.
У энцыклапедыю ўвайшло больш за 18 000 артыкулаў па самых розных галінах ведаў. Адлюстраваны пытанні культуры, культуралогіі, этналогіі, археалогіі, антрапалогіі, архітэктуры, мастацтвазнаўства. Таксама паказаны праблемы развіцця літаратуры, мовазнаўства, кнігадрукавання, СМІ, выяўленчага і дэкаратыўна-прыкладнога мастацтва, музыкі, тэатра, кіно, эстрады, цырка, тэле- і радыёмастацтва.
На прэзентацыі завершанага шасцітомніка, якая праходзіла ў Нацыянальнай бібліятэцы Беларусі, намеснік міністра культуры Васіль Чэрнік заўважыў:
— У культурным жыцці нашай краіны адбылася знакавая падзея. Ні ў кога з краін СНД няма такога выдання, якое зрабілі мы. Гэта выдавецкі праект, у якім упершыню так шмат гаворыцца аб багатай, разнастайнай мастацкай і народнай творчасці Беларусі.
У энцыклапедыю ўключаны таксама артыкулы аб матэрыяльнай і духоўнай культуры тых народаў, якія жывуць на тэрыторыі Беларусі, — рускіх, украінцаў, палякаў, армянаў, азербайджанцаў і іншых. Таксама паказаны сувязі беларускай культуры з культурамі дыяспар, іх узаемаўплыў і ўзбагачэнне.
Адметнасцю выдання з'яўляецца і тое, што ў ім шмат увагі ўдзяляецца аматарскай творчасці, якая ў апошні час атрымала асаблівае развіццё. Гэта артыкулы пра заслужаныя, народныя і ўзорныя аматарскія калектывы; артыкулы пра рамёствы, цікавасць да якіх з кожным годам не падае, а некаторыя, наадварот, пачынаюць адраджацца — выцінанка, мастацкае кавальства, выраб гліняных свістулек.
— Мы робім усё магчымае, каб захаваць энцыклапедычныя выданні, бо яны з'яўляюцца пэўным пашпартам краіны, яе будучыняй, — кажа дырэктар выдавецтва «Беларуская энцыклапедыя імя Петруся Броўкі» Уладзімір Андрыевіч. — Тое, што мы робім сёння, застанецца нашым нашчадкам. Над артыкуламі, якія ўвайшлі ў выданне, працавалі каля 600 навукоўцаў, дзеячоў культуры. Можаце сабе ўявіць, сюды ўкладзены душы столькіх вядомых людзей! Тых, хто развівае нашу культуру, рухае суверэнную Беларусь у лік лепшых краін.
Бадай, адзіным недахопам выдання можна назваць яго невялікі наклад — усяго 1500 асобнікаў кожнага тома. Ужо сёння даводзіцца марыць пра перавыданне, бо хочацца, каб такія кнігі былі ва ўсіх бібліятэках, у тым ліку школьных.
Фота Яўгена ПЯСЕЦКАГА
| Версия для печати | Сообщить администратору | Сообщить об ошибке | Вставить в блог |
