Прапанаваны Аляксандрам Лукашэнкам дыялог па праблеме бежанцаў стаў для Еўропы сывараткай праўды

Прапанаваны Аляксандрам Лукашэнкам дыялог па праблеме бежанцаў на беларуска-польскай граніцы стаў для Еўропы сывараткай праўды. Такое меркаванне выказаў загадчык аддзела сацыялогіі дзяржаўнага кіравання Інстытута сацыялогіі НАН кандыдат філасофскіх навук Мікалай Шчокін, каментуючы сітуацыю з мігрантамі на беларуска-польскай граніцы.

"Прапанаваны Аляксандрам Лукашэнкам дыялог для Еўропы стаў непасільнай ношай і сывараткай праўды. Больш таго, адкрытасць і логіка ў выбары варыянтаў развіцця сітуацыі кіраўніком дзяржавы не проста маральна абяззброілі безаблічных еўрачыноўнікаў, але і вызначылі непрыглядны лёс Польшчы. Польскае кіраўніцтва, расставіўшы палітычныя пасткі для Беларусі і старой Еўропы, само ў іх і трапіла. Паспрабаваўшы разыграць палітычную гульню адначасова супраць сваіх саюзнікаў і Беларусі, польскае кіраўніцтва для сябе выбрала памылковы метад выжывання і стала палітычным ізгоем, перайграўшы саміх сябе. Спасылаючыся на міфічныя правы людзей і свабоды, а таксама нейкую сістэму каштоўнасцей, якая не дае магчымасці весці дыялог або вырашаць прадметна праблемы з мігрантамі, калектыўны Захад прадэманстраваў тупіковасць сваёй палітыкі і смерць аднапалярнага свету. Многія забываюць, што менавіта цяпер дзеючыя Меркель, Макрон, Байдэн, Джонсан і шэраг іншых псеўдалідараў (і тыя, хто ўжо ў адстаўцы) выбудоўвалі дзесяцігоддзямі еўрапейскую карумпаваную структуру нецярпімасці, прагнасці, двайных стандартаў", - перакананы аналітык.

Паводле яго слоў, разброд і хістанне ў Еўропе, мафіёзнасць мыслення чыноўнікаў, злачынныя дзеянні НАТА, адраджэнне расізму і сегрэгацыі, а таксама нацызму сведчаць аб непазбежнай эвалюцыі ў бок выраджэння заходняй цывілізацыі.

"З пункту гледжання паліттэхналогіі і геапалітычных інтарэсаў Аляксандр Лукашэнка ў гэтай сітуацыі даў фору на сто ачкоў наперад. Зыходзячы з гуманных прынцыпаў, Прэзідэнт і беларускі народ праявілі лепшыя чалавечыя якасці, ратуючы ад немінучай гібелі бежанцаў. Адносна інсінуацый збеглых па дыялогу з імі адказ адназначны: збеглыя - гэта злачынцы і яны павінны панесці пакаранне і быць у турме. Са злачынцамі і тэрарыстамі Беларусь дыялог не вядзе", - адзначыў Мікалай Шчокін.

На яго думку, пацвярджэнне генеральным сакратаром ААН таго, што Беларусь не з'яўляецца ні крыніцай, ні прычынай патокаў бежанцаў, сведчыць, што праўда на нашым баку.

"У сувязі з гэтым усе пагрозы польскага кіраўніцтва аб перакрыцці чыгуначных зносін з Беларуссю - праяўленне комплексу непаўнацэннасці і інтэлектуальнай абмежаванасці нават у падыходах самазахавання. У будучым польскі народ не даруе свайму кіраўніцтву прыніжэння сваёй нацыі. Прымерыўшы на сябе маску палітычных ілюмінатаў, польскае кіраўніцтва стала на шлях самаразбурэння і выступіла значным каталізатарам унутрыеўрапейскіх канфліктаў і барацьбы як паміж палітычнымі, так і фінансавымі кланамі", - сказаў эксперт.

Ён упэўнены, што цяпер выхад з крызісу з бежанцамі можа заключацца толькі ў кампрамісным знаходжанні сітуацыйных рашэнняў.

"Важна для Беларусі не кансерваваць крызіс і не ісці ў рэчышчы згубнай і двудушнай палітыкі Захаду. Хоць трэба разумець, што з пункту гледжання геапалітыкі ўсё, што цяпер адбываецца ў многіх частках зямнога шара, у прыватнасці па перыметры Саюзнай дзяржавы, СНД і АДКБ, з'яўляецца шырмай, прыкрыццём перад сустрэчай Пуціна і Байдэна. Логіка падзей дыктуе свае правілы - абстаноўка імкліва будзе абвастрацца да таго часу, або пакуль не адбудзецца збой і будзе зроблены выстрал - (у выніку - ваенны, але скарацечны канфлікт), або чарговы раз мы пераканаемся ў кіруемасці працэсу, - разважае Мікалай Шчокін. - Для Беларусі сёння шлях толькі адзін - кожны факт учынення службовымі асобамі Польшчы злачынных дзеянняў павінен быць дакументальна зафіксаваны з далейшым узбуджэннем крымінальных спраў супраць усіх маючых дачыненне да злачынства супраць бяспекі чалавецтва і за выкарыстанне жудаснага "кактэйлю" хімічных сродкаў супраць бежанцаў. Дванаццаць дзён, якія ўзрушылі ўвесь свет, сталі пачаткам адліку заняпаду злачыннай хунты Польшчы і Літвы, што павінна быць добрым і апошнім урокам для ўсяго калектыўнага Захаду".

19 лістапада 2021, Мінск
БЕЛТА