ЕС уступіў у найглыбейшую рэцэсію ў сваёй гісторыі

Эканоміка еўразоны скароціцца на рэкордныя 7,7 працэнта ў 2020 годзе з-за пандэміі COVID-19, інфляцыя запаволіцца, а дзяржаўны доўг і дэфіцыт бюджэту будуць павялічвацца. Такі прагноз абнародавала Еўракамісія, паведамляе Reuters.

"Еўропа перажывае вельмі моцны эканамічны шок без прэцэдэнту з часоў Вялікай дэпрэсіі", - заявіў еўракамісар па эканоміцы. Паводле яго слоў, эканамічны спад на тэрыторыі Еўрасаюза ў 2020 годзе складзе 7,4 працэнта, а ў зоне еўра - 7,7 працэнта.

Еўракамісія прагназуе, што, паколькі эканоміка ЕС скароціцца ў гэтым годзе, спажывецкія цэны будуць стагніраваць. Узровень інфляцыі запаволіцца да 0,2 працэнта ў 2020 годзе, перш чым паскорыцца да 1,1 працэнта ў 2021-м, калі эканоміка еўразоны вернецца да росту ў памеры 6,3 працэнта.

На думку экспертаў, Італію, Грэцыю, Іспанію і Партугалію ў найбольшай ступені закрануць эканамічныя вынікі пандэміі, у той час як Люксембург, Мальта і Аўстрыя перанясуць іх лягчэй. Паводле прагнозаў, ВУП Грэцыі ў гэтым годзе скароціцца на 9,7 працэнта, Італіі - на 9,5 працэнта, Іспаніі - на 9,4 працэнта.

Чакаецца, што аднаўленне эканомікі пачнецца ў 2021 годзе. Пры гэтым тэмпы аднаўлення будуць нераўнамернымі як у Еўропе, так і ва ўсім свеце, паведамляе Deutsche Welle. Гэта, паводле ацэнкі еўракамісара па эканоміцы, залежыць ад тэмпаў адмены каранцінных абмежаванняў, залежнасці эканомікі ад турызму і фінансавых магчымасцей бюджэту. Тым не менш, такая няроўнасць з'яўляецца сур'ёзнай пагрозай для адзінства ўнутранага рынку і еўразоны.

"Мы павінны справіцца з гэтай праблемай", - падкрэсліў еўракамісар. Так, у Грэцыі ў 2021-м рост эканомікі скароціцца на 7,9 працэнта. Дэфіцыт бюджэту Італіі, якая найбольш пацярпела ад каранавіруса ў ЕС, складзе 11,1 працэнта ВУП у гэтым годзе, а ў 2021-м - 5,6 працэнта.

Узровень беспрацоўя ў ЕС, як чакаецца, павысіцца з 6,7 працэнта ў 2019 годзе да 9 працэнтаў у 2020 годзе. Годам пазней, лічаць у Еўракамісіі, ён крыху знізіцца, спыніўшыся на адзнацы каля 8 працэнтаў. Асабліва складана будзе маладым людзям, якім трэба будзе знайсці сваё першае рабочае месца.

Сусветная эканоміка, паводле прагнозаў, скароціцца ў 2020 годзе на 3 працэнты ў параўнанні з паказчыкамі 2019 года, што перавышае ўрон ад сусветнага фінансавага крызісу 2008-2009 гадоў.

Прадстаўляючы прагноз, еўракамісар адзначыў яго выключна вялікую нявызначанасць. Ён грунтуецца на тым, што краіны Еўрасаюза пачнуць паступова аслабляць каранцінныя меры ў маі. Калі барацьба з пандэміяй зойме больш доўгі час і запатрабуе больш сур'ёзных укладанняў, гэта можа прывесці да яшчэ большага спаду эканамічных паказчыкаў.

6 мая 2020, Мінск
БЕЛТА