Абстаноўку ў Беларусі спрабуюць расхістаць, таму ўлада прымае папераджальныя меры. На гэтым акцэнтаваў увагу Прэзідэнт Беларусі Аляксандр Лукашэнка падчас сустрэчы з актывам Мінскай вобласці ў Салігорску. Фрагмент яго выступу паказалі ў эфіры тэлеканала «Беларусь 1».
«Людзі не разумеюць, што ідзе спакойнае расхістванне абстаноўкі. Калі б мы тады некаторых не ацверазілі, сёння б ужо бушаваў і Салігорск. Усё пачынаецца паступова, мы гэта ведаем: расхістваецца абстаноўка ўнутры краіны, даводзіцца да мяжы, ідзе наступ на дзейную ўладу, адбываецца злом улады. Добра, калі хтосьці прабеларускі садзіцца ў крэсла, тады ладна ўжо з гэтым майданам. Праз майдан — беспарадкі, валакіта, аж да звароту да замежнай дзяржавы. Вы гэта выключаеце? А я не. Я павінен думаць па максімуме, таму што не ведаю, якія дзеянні яны распачнуць», - адзначыў Аляксандр Лукашэнка.
Прэзідэнт звярнуў увагу, што перажывае за краіну і адказвае за спакой у дзяржаве, таму прымаюцца папераджальныя меры.
«Іх ідэалогія — вяртанне да старой Канстытуцыі 1994 года. Дзіўна: перамены, рэформы і раптам 1994 год. Можа быць, ёсць у гэтай зале той, хто памятае, з чаго мы з вамі пачыналі? Калі ў мяне валяліся пад трыбунай у парламенце дэпутаты, калі я выходзіў выступаць. Калі ішла бойка (ніхто нічога не хацеў рабіць, ніхто нічым не займаўся) паміж новай уладай, якая зараджалася, і старым парламентам. Усё на народ перакінулася: забастоўкі, талоны, — нагадаў кіраўнік дзяржавы. — Вы хочаце туды вярнуцца? Вяртайцеся — без мяне. Але не дазваляйце вяртацца да таго, ад чаго мы з вамі сышлі».
«Выбары будуць вельмі цікавыя, а пасля выбараў будзе яшчэ цікавей. Гэта я абяцаю», — рэзюмаваў беларускі лідар.
«Калі вы хочаце браць хабар, за мяне не галасуйце»
«Калі хтосьці накіраваны на тое, каб нешта прадаваць танней, атрымліваць адкаты і хабары, мужыкі, не са мной. Вы за мяне і не галасуйце. Я не магу праз чвэрць стагоддзя перакрэсліць барацьбу з карупцыяй, з якой я пачынаў, будучы ў парламенце старшынёй камісіі па барацьбе з карупцыяй. Карупцыя — гэта іржа, якая раз’ядае грамадства і эканоміку цалкам», - падкрэсліў Аляксандр Лукашэнка.
Прэзідэнт адзначыў: у большасці беларусаў імунітэт да казнакрадства. «Наш народ гэта не пацерпіць. Я не магу спарадзіць алігархат у краіне», — заявіў кіраўнік дзяржавы.
«Калі Беларусь зробіць хоць адзін неасцярожны крок, то абрынецца пад абломкамі міжнародных канфліктаў»
«Калі мы зробім хоць адзін неасцярожны крок, мы загінем пад абломкамі супярэчнасцяў, канфліктаў і імперый», — заявіў Прэзідэнт.
Кіраўнік дзяржавы нагадаў пра супрацьстаянне паміж ЗША і Кітаем, канфліктах на Блізкім і Сярэднім Усходзе, а таксама ў краінах Афрыкі. Паралельна гэтаму Вялікабрытанія выйшла з Еўрапейскага саюза, заўважыў ён.
«Нам Еўрапейскі саюз напакасціў шмат: яны ўводзілі супраць нас санкцыі, пабудавалі плот на ўсходняй мяжы ў Польшчы, не хацелі з намі размаўляць. Не таму, што мы праводзілі не тую палітыку. Не. Яны не змаглі падпарадкаваць Беларусь свайму ўплыву. Мы ад гэтага адмовіліся. Часы прайшлі, яны зразумелі сваю памылку, з’явілася падстава (у тым ліку вайна ва Украіне і нармандскі фармат у Мінску) для таго, каб наладзіць з намі адносіны», - нагадаў Аляксандр Лукашэнка.
Паводле яго слоў, Беларусь пачала выбудоўваць адносіны з ЕС, не кладучыся пад яго. «Мы хацелі годна з імі супрацоўнічаць, яны гэта прынялі. Нарэшце нас заўважылі амерыканцы. Аказваецца, Беларусь для іх таксама важная. Прыезд многіх амерыканцаў, а потым дзяржсакратара ў Беларусь вельмі узбудзіў нашага ўсходняга суседа. Але мы суверэнная, незалежная дзяржава і маем права ажыццяўляць сваю як ўнутраную, так і знешнюю палітыку. Я зыходзіў перш за ўсё з гэтага, разумеючы, што заціснуты разам з вамі паміж молатам і кавадлам: з аднаго боку Расія, з другога — Еўрасаюз, і кацёл, які нас пастаянна падагравае з поўдня, — ваюючая Украіна», - сказаў кіраўнік дзяржавы.
Паводле яго слоў, у Еўрапейскім саюзе абвастрыліся адносіны паміж Германіяй і Францыяй з аднаго боку і краінамі Вышаградскай групы (Польшчай, Венгрыяй, Чэхіяй і Славакіяй) з другога. «Новыя дзяржавы Еўрапейскага саюза запатрабавалі павагі да сябе, — растлумачыў ён. — А што на Усходзе? Расія аказалася ўцягнутай ва ўсе войны і канфлікты. Акрамя гэтага, з’явіліся вельмі сур’ёзныя ўнутраныя праблемы. Яны звязаны з сур’ёзным падзеннем коштаў на вуглевадароды, да таго ж у іх з’явілася палітычная пандэмія — «абнуленне», новая Канстытуцыя».
Адзіным саюзнікам Расіі Аляксандр Лукашэнка назваў Беларусь. Прэзідэнт звярнуў увагу, што Расію выштурхваюць з вельмі маржынальных еўрапейскага і ўкраінскага рынкаў, у гэтых умовах яна не можа страціць Беларусь. «Яны будуць супраць нас ваяваць? Мы ў Расеі другія пакупнікі газу пасля немцаў, мы перапрацоўваем велізарную колькасць іх нафты. Вядома, яны не хочуць страціць Беларусь і эканамічна. Але больш за ўсё палітычна. Страціць Беларусь — гэта вельмі моцны ўдар па ўнутранай палітыцы Расіі», — заявіў ён.
Прэзідэнт звярнуў увагу: цяпер першараднае значэнне мае пытанне, не хто стане Прэзідэнтам у Беларусі (хоць і яно вельмі важнае), а якая будучыня чакае краіну на фоне шматлікіх канфліктаў у свеце. «Калі раней Расія мела манеўр на заходнім напрамку (Украіна, Прыбалтыка), то цяпер гэтага няма: Латвія, Літва, Эстонія лічаць Расію лютым ворагам, яны ў НАТА. Палякі ў НАТА. Ва Украіне яшчэ горш: ідзе вайна. У Расіі засталося адзінае акно, каб супрацоўнічаць з Еўропай (Беларусь.), дадаўся яшчэ Кітай», - сказаў кіраўнік дзяржавы.
З аднаго боку, такая сітуацыя дае Беларусі новыя магчымасці, з другога — ставіць яе пад ціск розных геапалітычных гульцоў, заявіў Аляксандр Лукашэнка. «Нас ірвуць ў Еўрасаюзе, на нас звярнулі ўвагу амерыканцы, і Расія ў страшным сне не можа ўявіць, што няма ў іх больш гэтага саюзніка. У гэтым плане я разумею кіраўніцтва Расіі, але заўсёды ім кажу: вы дабром павінны клікаць да сябе Беларусь. Калі ўжо пачынае вельмі іскрыць, кажам: мы выстаім, але з кім будзеце вы?» - адзначыў Прэзідэнт.
«Ідзе вельмі сур’ёзная барацьба за перадзел свету» — Аляксандр Лукашэнка пра супрацьстаянне паміж ЗША і КНР
«Ідзе вельмі сур’ёзная барацьба за перадзел свету. На палітычнай карце свету зьявілася новае магутная дзяржава, якая, можа, і неахвотна, але кінула выклік манапалісту — Злучаным Штатам Амерыкі. І гэта дзяржава — Кітайская Народная Рэспубліка. Там магутная ядзерная дзяржава, яны скончылі стварэнне групоўкі глабальнага пазіцыянавання. Яны ўсё робяць незалежна: уварваліся ў космас, асвоілі самую сучасную зброю. І гэтая эканоміка — першая па экспарце, па вытворчасці — другая пасля Амерыкі», - адзначыў Аляксандр Лукашэнка.
Паводле яго слоў, вядома, амерыканцаў гэта турбуе, яны спахапіліся. «Што такое страціць манаполію? Гэта стаць бяднейшымі. Кітайцы супрацівяцца, гэта вельмі акуратныя, асцярожныя людзі, але сапраўдны старажытны народ. Яны ўсталі ўпоравень з ЗША. Амерыканцы адчулі небяспеку. Пачалася гандлёвая вайна, якая сябе вельмі паказала ў мінулым годзе і пачатку гэтага, — сказаў Прэзідэнт. — Вядома, ужо сёння не адзін долар гаспадар на планеце, з’явілася еўра, была ена і яна ўзмацняецца. Юань стаў рэзервовай валютай — гэта прызнаў Міжнародны валютны фонд».
Аляксандр Лукашэнка канстатаваў: амерыканцы пачалі губляць пазіцыі. Кіраўнік дзяржавы прызнаўся, што часам сімпатызуе Прэзідэнту ЗША Дональду Трампу, але не можа пагадзіцца з тым, што той адкрыў ўсе франты і ваюе з усім светам. «Калі яго дзяржсакратар (Майкл Пампеа.) быў у мяне, мы з ім абмяркоўвалі гэтую тэму, і я яму задаў пытанне, калі адзін на адзін сустракаліся: вы навошта ваюеце з усім светам? Гэта вам дрэнна абыдзецца. Навошта вы адкрылі фронт супраць Расіі? У ваенных адносінах Расія — краіна магутная», — заўважыў Прэзідэнт.
Ён дадаў, што ідзе не толькі гандлёвая вайна: па ўсім ўсходнім, паўднёва-ўсходняга ўзбярэжжа амерыканцы акружаюць Кітай. «Дадайце да таго Паўднёва-Кітайскае мора, дзе адкрыты велізарныя радовішчы вуглевадародаў. Натуральна, кітайцы прэтэндуюць на асваенне. Тут у іх сутыкнуліся інтарэсы з В’етнамам. В’етнам аднавіўся, у іх ужо пад 100 млн насельніцтва, выдатная эканоміка. Краіна адзін з азіяцкіх тыграў, вельмі інтэнсіўна развіваецца», - звярнуў увагу Аляксандр Лукашэнка.
Паводле яго слоў, амерыканцы актывізавалі усе сілы вакол Кітая і падганяюць раздрай унутры краіны.
Кіраўнік дзяржавы згадаў пра забойства ў ЗША паліцэйскім афраамерыканца Джорджа Флойда, пасля чаго ў гэтай краіне пачаліся пратэсты. Прэзідэнт лічыць, гэтае здарэнне стала толькі трыгерам, аднак не прычынай хваляванняў. Ён растлумачыў: магутная краіна паказала няздольнасць змагацца з пандэміяй каранавіруса і 60 млн чалавек засталіся без працы, пераважна афраамерыканцы.
«Хто б мог падумаць, што гэтая магутная дзяржава не вытрымала гэтага напору. Да часу задаць пытанне (я яго задаваў яшчэ два месяцы таму): гэтая пандэмія — гэта рукатворнае мерапрыемства? Я не ведаю. Вы падумайце. Гэта значыць, ці не спецыяльна гэта было створана для таго, каб Кітай і Амерыка, сутыкнуўшыся ілбамі, перадзялілі свет і «прышпілілі» да сябе іншыя краіны, — выказаў меркаванне Прэзідэнт. — Аснова — гэта эканоміка. Галоўная прычына гэтага канфлікту ляжыць у эканоміцы. Патрэбны маржынальныя рынкі збыту, а іх не хапае. Пачалі дзяліць існуючыя»
Звязда, 29 чэрвеня 2020
Кoличество переходов на страницу: 330
| Версия для печати | Сообщить администратору | Сообщить об ошибке | Вставить в блог |
